粗獷味爆燈 JAC T9 EV

採用全新純電Pickup底盤嘅T9 EV，係JAC首款雙摩打4X4電動Pickup，高頭大馬嘅外形，提供又高又闊嘅視野，山路上表現比想像中靈活，在市區揸住佢，會有大地任我行嘅感覺，操控亦輕鬆容易。動力來自88.02 kWh磷酸鐵鋰電池，WLTP續航距離340公里，對充電焦慮嘅駕駛人來講係扣分之環節。

來自內地嘅JAC T9 EV，以美式Pickup風格包裝，號稱全港首部電動四驅農夫車，售價港幣$368,800，進軍競爭相當激烈嘅香港Pickup商用車市場。

乜嘢人會揸呢類車呢？

講到美式Pickup，T9 EV高頭大馬嘅外形，又真係有啲似來自美國嘅Ford Ranger；不過睇真啲，面積隨時大過勞斯萊斯嘅車頭面罩，又真係幾有霸氣；頭燈及日間行車燈嘅設計，亦採用凌厲風格，加埋尾箱上嘅防滾架，粗獷味爆燈。

Pickup在香港叫農夫車，不過香港農夫其實唔多，乜嘢人會揸呢類車呢？一般會用作工程車，建築地盆腳車，偶然又會有潮人揸Pickup，潮得嚟又真係幾Man。我就覺得冇頂嘅貨斗，揸去滑浪應該幾實用，夠晒吸睛，又唔怕日曬雨淋。

大地任我行嘅感覺

高頭大馬四驅底盤設計嘅T9，離地距都相當高，所以車側兩邊踏板唔係扮有型，係真正有需要的。想好有型坐上車的話，最好先拉住A柱上嘅手挽，再按個人身手靈活度，摸索一下用右腳定左腳上踏板最啱自己。

至於又高又闊嘅視野，係幾霸氣嘅。在市區揸住佢，會有大地任我行嘅感覺。燈口起步，前後兩個摩打分別輸出70kW及150kW，夾埋差不多三百匹馬力，加上電動摩打強項就係即時嘅加速，所以驅動3,260公斤嘅T9，依然好爽快。在多彎嘅山路上，揸住車身長5,330mm，軸距有3,110mm嘅T9，比想像中靈活，遇上連續S彎，高離地距嘅車身難免會向外傾，但四個車輪就相當咬地，行車依然平穩，操控輕鬆容易。

坐在車廂令人有feel good之感

採用現代化設計風格嘅車廂，配多功能皮革軚盤及數碼儀表，中間係相當搶眼嘅10.4吋觸控螢幕資訊娛樂系統，支援Apple CarPlay及Android Auto智能手機連接，又有無線充電。前座空間相當闊落，後排空間亦令人滿意，配備原廠皮革座椅，仲有一個飲品冷凍格，整體令人有feel good之感。

粗獷味爆燈嘅T9 EV，設備原來都相當豐富。頭燈係自動感光開關，又配備前後霧燈，電動調校嘅門邊鏡可以自動摺合，具備免匙系統及定速巡航，電動調校駕駛座，後座亦有兒童安全座椅扣。

安全設備亦十分齊全

包括前座雙安全氣袋、側面安全氣袋及窗簾式安全氣袋，另外仲有一系列電子安全設備：防鎖制動系統、車身穩定系統、制動力分佈系統、斜路起步輔助、循跡控制系統、車輛動態控制、盲點監察、車道預警輪胎氣壓感應等等。

2025 JAC T9 EV 規格表
摩打形式：恆磁同步摩打
電池容量：88.02kWh磷酸鐵鋰電池
最大馬力：299ps (前70 / 後150 kW)
峰值扭力：516Nm (前176 / 後340 Nm)
續航距離：340km (WLTP)
傳動形式：雙摩打四輪驅動
傳動系統：單速直接驅動
極速：140km/h
懸掛系統：(前)雙搖臂/ (後)葉片彈簧
制動系統：(前/後)碟式
車輪；18吋鋁合金
輪胎：265/60R18
長x闊x高：5,330 x 1,965 x 1,920mm
軸距：3,110mm
貨箱長x闊x高：1,520 x 1.590 x 470mm
車重：3,260kg (G.V.W)
淨載重量：800kg
快充：DC直流 (15-80% ) 45分鐘
售價：港幣$368,800起