行走台灣。花蓮

不要被莊園兩個字、或者網上圖片那氣派的大門口嚇親，
花蓮統茂渡假莊園其實房價相當親民，同呢度嘅服務一樣咁親切。

P編係去到任何地方都鍾意行路來體驗當地，到埠花蓮當天滂沱大雨，唯有搭的士由花蓮火車站到酒店。 落車後有點懊惱：四野望去都係田田同埋田，會唔會行成個鐘都無嘢睇無嘢玩？ 事實證明P編過慮了，呢度距離花蓮市區都幾近但又可以享受田野寧靜&好空氣，對鍾意熱鬧但又嚮往鄉郊寧靜嘅香港人來講實在好啱。
如果只係想在附近逛逛，酒店有幾款單車可供借用，踩單車只需要10分鐘左右就可以到市中心（如果揸車/揸電單車就更方便啦）。 酒店仲有電單車可以租用，租24小時都只係NT580（HK$150左右)；又或者好似P編咁選擇行路，都係25～30分鐘就來到熱鬧既市中心，食嘢行街都相當方便。

如果你鍾意花草庭院，呢度嘅後花園就不容錯過啦。 設計錯落有致之餘睇得出係有精心打理既，花草樹木都係好健康茂盛嘅狀態。 呢度仲有三個大細不同的池塘，經理同我講：“呢幾個池以前好多錦鯉㗎，不過呢幾年有一隻候鳥每年都係呢個時間來‘度假’食錦鯉自助餐，所以依家越來越少錦鯉囉，留低嘅都係近乎黑色嘅吳郭魚。 不過睡蓮就越生越茂盛，我地呢度嘅睡蓮好特別 - 係夜晚至開花㗎，唔信你今晚食完飯過來睇睇”

雖然花蓮有好多美食，但聽完經理介紹P編對酒店既野菜火鍋自助餐非常感興趣，所以決定留在酒店食飯。 除咗套餐有跟既一碟豬肉一筒蝦滑外，前菜、蔬菜、火鍋料任食。 叫得野菜火鍋果然好多菜可以選擇，好多都係當地（吉安鄉）即日送到既，新鮮就當然夠鮮甜啦～ 不過P編最鍾意既反而係芋頭，嗰種入口即溶好似雪糕咁滑既口感實在驚嘆！ 問經理芋頭係邊度來既佢淨係好神秘咁笑而不答。。。 甜品區仲有酒店自製既咖啡凍，咖啡味濃又唔會好甜，厲害厲害～ 當晚咁啱就係有一個家族旅行嘅團體入住，晚餐時玩到不亦樂乎，成間餐廳都係佢地嘅笑聲。

同台灣好多酒店一樣，呢度最旺季係暑假，最多係親子遊/家族旅遊嘅人客，所以房間類型比較多，無論係二人出遊定係大棚親友來到都一定搵到啱你嘅房型。 房間好闊落好乾淨，每間房都有個小小露台，望出去滿眼都係綠油油嘅田野景色，而且空氣十分清新。浴室係乾濕分離（呢樣對有些許潔癖嘅P編來講好重要 哈哈），因為地方夠大每間浴室都仲有位放得落一個大浴缸，記得自帶浴鹽來好好relax吓啦。 最驚喜嘅係佢地既床承托力適中、床單被鋪好軟熟，非常好瞓！令P編重拾久未體驗既8小時酣睡～

p.s. 酒店門口就係台9線，住呢度而揸車去花東縱谷玩非常方便，當然要去花蓮市區食同玩就更就腳啦。 P編有特登問過經理，呢度有好大地方可以泊車，無論係私家車隊/電單車隊環島遊都相當適合。