賓利Bentayga長軸距版公布售價

賓利在2015年推出嘅Bentayga，終於都有長軸距版，而且內飾可以選配帶有當代藝術品味道嘅金屬裝飾塗層，形象比傳統木飾更為年輕有型。

Photo by：Playful

買得Bentayga嘅老闆，都應該想後座可以更加寬敞，坐得更加舒服；所以Bentayga長軸距版，軸距由2,995mm加長到3,175mm，所加長嘅180mm長度，全數加在後座。

至於廠方稱之為Bentley Airline Seat嘅後排座椅，強調可作22種角度調節，可以電動調教成為最後傾40度嘅躺椅，前座會自動向前移，為後座提供更寬敞空間，座椅又有自動溫度感應及自動調節溫度，加上按摩氣囊，甚至連後門側扶手及後座中央手枕都有加熱功能，對後座老闆嘅舒適照顧可謂無微不至。

車廂陳設方面，當然都係標榜英國手工皮革工藝，除此之外，內飾方面都有一大搶眼新配備：屬於可選配嘅金屬裝飾塗層，設於儀表板及前座乘客前方，以及四度車門上，有少少當代藝術品嘅味道之外，感覺又非常之有卡士，而且比傳統木飾更為年輕有型。

對於已習慣在手機螢幕操作嘅用家，新車又設有Touch Screen Remote控制，方便調節座椅傾斜度及其他車廂功能，車門上又設有按鈕，選擇「放鬆」模式時，座椅可以調校至最大傾斜度，當選擇「商務」模式時，座椅就回復正常角度。

新車其中一大焦點，係首次配備電動關門設計，按其中一個開關按鈕，就會電動運作關閉車門，使用上更加方便。

性能方面，配4公升V8雙渦輪増壓引擎，最大馬力550匹，透過8前速自動波箱，以四輪驅動，0-100km/h加速需時4.6秒，新車售價由港幣$4,358,000起。