好玩Lomax三輪車

外形似老爺車嘅Lomax，其實係來自英國嘅kit car，至於動力及機械部件，就來自雪鐵龍2CV車仔。

Photo by：Playful

Lomax kit car套件組裝車歷史最早可追溯到1982年，由Lomax Motor Co製造，現時英國一些老爺車網上仍可以找到80年代嘅Lomax 223及224。其後Lomax嘅製造經過兩度易手，最近轉為由Lomax Cars生產。

採用Citroën 2CV機械部件嘅Lomax，車身就採用GRP (Glass Reinforced Plastic)玻璃纖維製造，最有趣應該係來自雪鐵龍嘅水平對向2汽缸引擎，而且係風冷設計，基本版容積602cc，另外又可選652cc，馬力由29-35匹，配4前速手波。

眼前三架Lomax型號都係223，3代表為三輪車型，另外仲有224型號，就係四輪兩座位Roadster。車廂同外形都採用30年代老爺車風格，賣相非常趣緻又搶眼。

藍色Lomax車主係阿Ken，由2018 開始擁有，個人喜歡三輪車，在綱上碰啱Lomax 此款車，覺得既classic又特別。

駕駛感覺如何？
好自由自在，加上三輪車，在香港法例下，不用帶頭盔不用安全帶沒有拘束。

出牌困難嗎？用左幾多時間？
香港第一架Lomax 落地，懷着戰戰兢兢心情去實踐，改造，通過各樣測試，直接合格出牌花了一年多時間。

黃色Lomax車主Jeff表示，擁有咗呢架車一年，鍾意復古車造型，開篷設計，每次揸出街都會令自己同街上面見到啲人帶出一份親和嘅歡樂感。至於Kit car樂趣，在於要尋找相關零件，可以自己diy個人風格，我哋每一架車，都有自己喜歡嘅元素，帶出每個人嘅唔同風格，除咗駕駛之外，仲有另一番玩車既樂趣。

駕駛感覺如何？
三輪車設計，轉向比普通車少，要留意轉彎，駕駛感覺原始直接，加速力都可接受，因為車身比較扁平，車身比較貼地，好有一種小型賽車感覺，有私家車同電單車中間嘅感覺及樂趣。但畢竟係多年嘅舊車，揸車嘅態度都會保守一點，要估計剎車及加速距離。

出牌困難嗎？用咗幾多時間？
出牌方面，交畀專業人士處理，對自己來講係最難嘅部份，要去外國搜羅自己喜歡嘅車盤，可遇不可求。

紅色Lomax車主Kevin表示：由2019年開始擁有呢架車，鍾意佢夠特別，少有，收視率高，而且喜歡開篷車，有個性，又可以好多diy

駕駛感覺如何？
直接、但轉向幅度少，如果高速入彎會有甩尾嘅感覺

出牌困難嗎？用左幾多時間？
交俾專業人士，時間長或短係視乎政府排期，但最主要都係睇吓架車是否符合政府嘅規例。