限量299 架Testa Rossa J

法拉利與專為小朋友生產汽車嘅The Little Car Company 合作，按照著名經典車型1957 年 250 Testa Rossa嘅 75% 比例，推出限量299 架法拉利 Testa Rossa J 複製品，由電動摩打提供動力。

法拉利250 Testa Rossa係法拉利史上最Iconic亦係最成功汽車之一，一直係收藏家夢寐以求嘅珍藏，而售價93,000歐元限量299 架嘅Testa Rossa J，J代表Junior，由法拉利造型中心負責監督比例同埋塗裝，而底盤及其他部件，就採用法拉利 Classiche 部門原始設計圖紙進行設計。

製作方面，車身由手工鍛造鋁材製成，電動摩打由安裝在車身前方三個電池驅動，續航里程約90 km，輪胎同樣由法拉利技術合作夥伴Pirelli提供，並搭配手工製作12吋鋼絲輪圈，甚至連Bilstein懸掛系統，都係由法拉利專業試車手在Fiorano測試賽道完成調校工作，真係一啲都唔簡單。

埋身睇真啲，細節位可謂精雕細琢，內飾設計同樣忠於細節，同1957年250 Testa Rossa車型一樣，軚盤都係Nardi提供，而且用埋原裝嘅儀錶板設計及字樣，不過就配合番電動車嘅用途，油表和水溫錶變為監測電池及電動摩打溫度，燃油表及轉數表就成為電池表及車速表。最有趣嘅破綻係居然有埋現代化Manettino旋鈕！而且可提供四種駕駛模式，首先係專為新手而設嘅Novice模式(1 kW / 20 km/h)下，可通過對加速嘅限制甚至遙控停車以保障安全，至於Comfort模式(4 kW / 45 km/h)、Sport或Race模式，就畀小朋友循序漸進學習同埋感受速度嘅提升。

由於 Testa Rossa J始終係Junior Car，雖然設計為可供 14 歲以上人士駕駛，不過就唔可以在道路上合法駕駛，都係留番在私人花園大宅內畀小朋友率先感受吓全電動法拉利跑車啦。