運動模至正斗 BMW X5 xDrive 35iA

七座SUV，巿場選擇唔多，要加埋慳油夠力又劈得下，可能真係得X5。

X5是寶馬第一輛運動型多功能四驅車，當年為咗趕上這股由北美吹到歐洲的熱浪，BMW透過收購Rover而取得Land Rover所有的四驅及專利技術。

呢部只用咗5年時間開發，底盤編號E53的首代X5，喺美國Spartanburg工廠出世之前，為咗強調佢比同類SUV更加適合城市使用，寶馬為佢準備咗一個新穎的車系名稱 - Sport Activity Vehicle。

孩童專區
今次長測的第三代X5，屬於汽油版的入門型號xDrive 35iA，雖然設計師Olivier Heilmer曾經強調，今代主要是對上一代進行強化工程，但個人認為外形及線條運用都明顯比以往硬朗。整個X5車系都以7座為標準設定，不過呢對由行李艙變出來的第三排座椅，無論空間或乘坐質素都比較適合小朋友多啲，這亦是大部分7座SUV的通病，原因係較高的地台限制了空間發展。

以駕駛人為本
講真，呢對後座只宜作不時之需，唔太適合當成常規座位，因為拉起之後，行李艙會無咗近2/3的容積，想放一部小學雞的16吋單車就會有啲難度。車廂算唔算豪華，呢樣就見仁見智，不過我幾欣賞寶馬可以完全兼顧到右軚巿場的需要，把所有屬於駕駛人的操作鍵一件不漏咁搬晒去右邊駕駛艙，唔似得其他歐洲對手咁搬啲唔搬啲。

多項尖端引擎技術
動力方面，編號N55的3.0公升直四TwinPower Turbo引擎，內藏寶馬4項現今最頂尖的科技，包括Twin-Scoll雙渦流增壓技術、HPI缸內直噴、Valvetronic汽門升程可變系統及Double Vanos可變雙凸輪軸正時技術，除咗輸出已超越第一代X5所使用4.4公升V8的M62引擎之外，耗油量亦比上一代初期探用3.0公升L6的N52引擎降低咗16%。綜合5天長測數據，在ECO Pro模式之下，公路平均時速60.8km，錄得每百公里耗油9.5L；巿區平均時速39.1km，錄得每百公里耗油11.8L。

慳油模式純粹慳油
除了ECO Pro，自選駕駛模式還有Comfort、Sport及Sport +，選鍵就在波棍右面觸手可及的位置，操作比平治及福士都要方便。ECO及Comfort mode的濾震表現分別不大，但我嫌緩衝反應的沉澱感多咗少少，回彈延伸的動作有啲飄浮；Comfort mode會以D2為起步檔，油門反應比ECO Pro敏感少少，輸出比較緊湊自然。

寶馬感覺番晒嚟
相比之下，我較buy Sport mode的懸掛反應，緩衝動作快慢與深度適中，夠結實唔虛浮，駕乘感都比Comfort mode出色。油門敏感度高咗，升檔時，引擎轉速下滑所產生的輕微頓挫感會令人咬住油門唔想放，成個feel似番晒寶馬。轉用Sport +，所有機械動作會再結實一點，敏感度又再高一點，攻彎抗傾力亦強多一點；1,300至6,000rpm轉區表現力綿氣長，引擎調校似自然吸氣多過渦輪增壓，無冷場；用Sport +劈番轉，係好玩的，定的，但代價係燒多啲油。

BMW X5 xDrive 35iA 規格表
引擎：L6 TwinPower Turbo
容積：2,979c.c.
馬力：306hp@5, 800-6,400rpm
扭力：400Nm@1,200-5,000rpm
傳動：前置引擎/四輪驅動
波箱：8前速Steptronic全自動配軚盤+/-轉檔
0-100km/h：6.5秒
極速：235km/h
懸掛：(前)雙搖臂/ (後)多連桿
制動：(前/後)通風碟
輪圈：18吋合金
輪胎：(前/後)255/55 R18 Michelin Latitude Sport 3
長x闊x高：4,886x 1,938 x 1,762mm
軸距：2,933mm
車重：2,005kg
油耗：8.5L/ 100km (Combined)
廢排：199-197g/km
售價：$739,900 (Promotional Price)