加櫈唔該 Nissan Serena Highway Star VIP

對於務實型用家嚟講，有時只要幾樣窩心的設備已經足夠。

MPV，體形大，先天條件令佢有更大的後天發展空間，所以車廂配置會比一般汽車豐富，至於啱唔啱用，就真係好睇個人需要了。

同級僅有的雙色設計
在眾多中級MPV裡面，Serena的配備裝潢唔算奢華，但就好細心，唔會忽略後座乘客的需要。今次長測呢部高級版Highway Star VIP，跟標準版Highway Star比較，除了車身可選擇two-tone顏色之外，座椅亦採用了雙色合成皮革及防滑纖維物料；仲有Intelligent AVM環視顯像系統、MOD動態探測系統、Plasmacluster Ions離子簇空氣淨化系統、DAA疲勞駕駛提示、前側安全氣袋及窗簾氣袋。

同級獨有隔空開門
當大家仲玩緊雙電趟門甚至遙控開門的時候，新一代Serena已經行前一步，加多一項「隔空開門」功能。呢項名為Tic Tac的自動感應系統，我相信靈感係來自豪華房車，如果你抱住個B揹住個袋又推住架BB車，咁只要用腳在電趟門下方掃一掃，趟門就會自動打開，不過為了避免誤觸感應器，系統需要與車匙距離80cm（約兩呎半）的範圍內才能啟動，即駕駛人需要袋住車匙先可以用到呢項功能。

照顧周到
今代Serena有幾樣唔花巧但又好窩心的設備，其中一樣係可以由7座變成8座，呢張「加櫈」平時會摺埋放喺前排當手枕箱，有需要坐多一個的時候，只要沿路軌向後拉到中排，就可以由2+2+3變成2+3+3；呢個具備16種變法的座椅布局，頭中排的椅背更設有獨立餐枱及USB充電插座，無論坐邊都唔會覺得被忽視。

後排落車不求人
後排除了可向兩側摺起以提升行李艙容量之外，仲設有兩項「不求人」裝置，當需要離開車廂時，只要踩下設於中座底部的腳掣再順勢向前推，中座連椅背就會向前收起，再撳一撳旁邊的獨立按鍵，電趟門就會自動打開。車廂的活動範圍唔會令人覺得擠迫，亦唔會大到令人覺得疏離，座位與座位之間的距離啱啱好，加埋配色潔亮，令整個車廂氣氛都好warm好close。

車廂夠開揚
雖然標準行李艙容積都算ok，但後排唔可以向前滑移，即是話，唔可以在8座的設定下，同時增大行李艙空間，要容納兩部6至10歲的小童單車，就一定要摺起一邊後座，不過由於前手枕箱可以變多一張中排座椅，所以就算摺起一張半後座，都依然可以坐到6個人。行李艙門用咗一項名為Dual Back Door的設計，即係可以整塊艙門打開之外，亦可選擇只揭起尾玻璃，好處我估唔使多講。由於車身高，為了方便從尾窗口存取物件，玻璃窗採用咗較高身的設計，而為咗視覺上的配合，車側窗的面積亦較大，但考慮到唔是個個都鍾意呢份開揚感及夏天車廂温度的問題，原廠已經準備咗一對伸縮式遮陽簾，雖然唔算豪華裝備，但睇得出車廠好細心好夠誠意。

花少少錢解決問題
我無打算數下全車總共有幾多個杯架掛鈎儲物櫃，反正夠用有突；不過咁，行車時，物件與儲物格會發出輕微碰撞聲，想解決呢個噪音問題的話，可以去「十蚊兜」買塊防滑膠墊，再剪裁出合適的尺寸放入儲物櫃內，以減低物件碰撞的機會。

咁揸先夠醒
編號C27的新一代Serena，心臟都係用番上一代MR20DD的兩公升直噴自然吸氣配XTRONIC無段變速波箱，馬力由147ps輕輕上調至150ps，輸出尚可。巿區及公路用ECO mode行車，目的係想慳油，所以要預咗油門敏感度較低，需要快速切線過車的話，唔使猶豫，一定要一腳踩到落底。上斜或者山路，我會建議關掉ECO mode，目的係要恢復油門供油的真實比例，咁樣會實在啲好揸啲。至於Sport mode，雖然可以靠延遲轉波時間來增取多一刻扭力，但消耗較大，亦會影響乘坐質素，所以我會留番落斜用，利用佢的機械特性來限制車速，減低制動損耗；至於L波就可以留番斜度較大的下坡道用，再配合制動作適當調速。

實用又慳油
為咗可以更慳油，所有連接發動裝置的皮帶，都用咗全新設計的拉力限制裝置Dual Arm Tensioner來減低引擎負荷；唔只咁，還有曾經在上一代後期加入的S-Hybrid系統，呢套節能系統主要是為冷氣及車燈等設備提供電力，除咗延長ISS裝置的引擎熄火時間之外，仲可以輕微輔助引擎加速；長測4天，總共行咗280km，巿區在平均時速21km的情況下錄得9.0km/L耗油量，公路平均時速64km，耗油13.3km/L。抵讚係同級獨有的Intelligent AVM環視顯像系統，有咗佢，窄位泊車零難度；缺點係入隧道時，懸掛噪音稍為明顯。作為一輛家庭車，新一代Serena的配置真係唔錯，唔耍花拳繡腿，所有設備都實實際際，亦能做到節能的本份。

Nissan Serena Highway Star VIP 規格表
引擎：L4 DOHC 16V
容積：1,997c.c.
馬力：150ps@6,000rpm
扭力：200Nm@4,400rpm
傳動：前置引擎/前輪驅動
波箱：X Tronic CVT無段變速全自動
懸掛：(前)麥花臣支柱/ (後)扭力桿
制動：(前)通風碟/ (後)實心碟
輪圈：16吋合金
輪胎：(前/後)195/60 R16 Bridgestone Ecopia EP150
長x闊x高：4,770x 1,740 x 1,865mm
軸距：2,860mm
車重：1,690kg
油耗：16.6km/L (6.0L/ 100km)
廢排：140g/km
售價：$339,800 (Highway Star VIP)/ $309,800 (Highway Star)