唔想落車 Porsche Panamera 4 e-hybrid Executive

要高性能，慳油，揸得過癮，坐又舒服，我諗真係無幾多部。

要有聲有勁，最低限度都要V6偈；要慳油，就一定唔少得油電混合，再加埋要坐得舒服的話，長陣版係基本要求。今次測試的保時捷Panamera 4 e-hybrid Executive，就有齊以上條件，問題係，到底長陣版會唔會影響性能表現。

混能唔一定係油電混合
提起Hybrid，第一時間會令人諗起Insight及Prius兩位90後的混能代表；所以我成日話，日本仔最醒就係把別人的技術發揚光大，呢樣真係唔到你唔服。
Hybrid的意思係「混能」，但唔一定係燃料引擎加電動摩打，所以油電混合動力的英文會寫明係Hybrid Electric Vehicle，簡稱HEV。

油電雙動能之父
全球第一輛HEV，係由保時捷博士一手炮製的Semper Vivus，未聽過呢部車唔出奇，因為講緊已經係118年前嘅事。呢部於1900年首次在巴黎世界博覽會上展出的串聯式油電混能車，係由純電動車Lohner-Porsche改裝而成，換句話，Porsche喺純電驅動及油電混能方面都非常有遠見。

廿一世紀捲土重來
不過好多嘢都要夾timing，走得太前都唔一定贏的。雖然Semper Vivus因為各種原因而未能投產，但隨着歐盟對廢氣排放標準的進一步收緊，節能已經成為21世紀汽車製造業必須關注的命題，而身為HEV先驅的保時捷亦把握技術上的時機，先後為Cayenne及Panamera推出Hybrid型號。

容量提升重量不變
進入第二代的混能版Panamera，跟上一代Panamera S e-hybrid同樣配備plug-in外插式充電功能；在重量不變的情況下，鋰離子電池的容量由以往的9.4kwh提升至14.1kwh，使純電續航距離從18-36km增加到25-51km。據廠方公布數字顯示，使用附設的家用充電裝置，4至5小時就可以完成充電。

輸出大耗油減
引擎跟早前測試的Panamera 4S採用同一副2.9公升V6雙渦輪增壓，不過輸出就由440hp及550Nm下降至330hp及450Nm，再加埋電動摩打的136hp及400Nm，綜合動力輸出就提升至462hp及700Nm，即是輸出大咗又慳油咗；跟同屬長陣的汽油版Executive比較，綜合耗油及廢氣排放分別減少達5.3L/100km及124g/km，都咪話唔誇張。

標準配備快速切換功能
傳動跟上一代Panamera一樣係8前速，但就由Tiptronic全自動換上PDK雙離合器半自動波箱。軚盤右下方的Sport Chrono旋鈕是標準裝備，可以快速切換駕駛模式。除咗Sport及Sport Plus之外，混能版仲有4項針對電能介入方式的選擇，包括自動切換油電模式的Hybrid Auto、純電模式E-Power、預留電量模式E-Hold及純充電模式E-Charge，點用先至最慳油，就要留待日後長測報告。

強項係中段加速及穩定度
雖然呢部e-hybrid的總輸出比4S多22hp，但大家同樣配備Sport Chrono package的情況之下，e-hybrid在0-100km的表現反而比4S慢了0.5秒，原因e-hybrid的混能系統及長陣豪華設備的原故，令總重多咗380kg，所以在Hybrid Auto的模式下，頭段加速嗰下唔及4S的迅猛，但中段加速就非常凌厲。今次測試的型號配備了沿自911的後輪轉向系統，雖然加長咗150mm的軸距影響了彎路的銳利表現，但穩定程度就相當高。

超強的底盤調校功力
採用雙層玻璃設計的Executive，車廂隔音水準更勝4S，所以無論路噪或引擎排氣聲都被進一步降低，諗住用Sport Plus迫令引擎咆哮，可能會有啲失望。後座係全車最舒適的區域，起初我都有啲擔心車軸長咗咁多，會唔會影響後座穩定性，結果在石澳道一段，我發覺就算遇到略為顛簸的路面，緩衝的反應唔單只快，仲有一股吸吮力把震盪完全抵消，令後輪更加黏實地面，呢種咁精細熨貼的底盤調校功力，只要坐過你就知道保時捷懸掛專家呢個名唔係浪得虛名。

後座設備有排玩
除咗好坐穩定，後座仲具備多角度獨立調校功能，而兩部掛在前座頭枕後方的10.1吋內置多媒體觸控式屏幕，既可以控制影音系統及支援Google Play Store之外，又可以監察車速、胎壓及引擎狀態等各項行車資料，就算坐喺後面都大把嘢玩。

2018 Porsche Panamera 4 e-hybrid Executive 規格表
引擎形式：V6 Twin Turbo
汽缸容積：2,894c.c.
最大馬力：330hp@5,250-6,500rpm
峰值扭力：450Nm@1,750-5,000rpm
電動摩打：恆式同步摩打
最大馬力：136hp@2,800rpm
峰值扭力：400Nm@0-2,300rpm
混合動力總馬力輸出：462hp@6,000rpm
混合動力總扭力輸出：700Nm@1,100 rpm-4,500 rpm
傳動形式：前置引擎/四輪驅動
傳動系統：8前速PDK雙離合半自動配軚盤+/-轉檔
懸掛系統：(前)雙搖臂/ (後)多連桿
制動系統：(前/後)通風碟
輪圈：20吋合金
輪胎：(前) 275/40 R20/ (後) 315/35 R20 Pirelli Cinturato P7
長x闊x高：5,199 x 1,937 x 1,428mm
軸距：3,100mm
車重：2,250kg
0-100km/h：4.7秒
極速：278km/h
純電限速：140km/h
耗油量：2.5 L/100km (Combined)
耗電量：15.9kWh/ 100km (Combined)
電動續航力：50km
碳排量：56g/km
售價：HK$1,908,000 up