59講過, 喺歐洲租車, 一定要make sure係棍波, 不過今次完全顛覆咗歐洲自駕遊嘅體驗。喺《租車奇遇記 (3)》提及過, 要回帶講返較早前同一間公司點搞。 59租車無數次, 呢一次嘅體驗係最差之一。歐洲自駕遊, 59已經唔知第幾次。 英國、法國、挪威、意大利、西班牙都玩過。 除咗喺英國其中一次, upgrade咗架平治(Mercedes-Benz) E-Class俾我之外, 次次都係棍波, 冇例外。出發前, 59照例先睇格價網, 睇啱一間大型美國租車集團嘅deal, 再上官網覆核。 再一次發現, 原來官網價錢一樣, 咁就喺官網訂啦。 順帶一提, 格價網通常有平少少嘅保險選項, 但假若出咗事需要索償, 您係先要向租車公司全數賠償, 再同格價網為你投保嘅保險公司追討善後。  三幾日差價一百幾十, 唔值得死咁多細胞, 所以59多數都係直接買租車公司嘅保險套餐, 無謂慳少少啦。 攞車當日, 遇上一個睇落好心, 但內裏古惑嘅職員。  車, 我係訂福士(Volkswagen) Golf或同級四門揭背車。 一時諗唔起, 原來俾我嘅SEAT Ibiza實為福士Polo嘅姊妹車, 即係低咗一級! 更大鑊嘅係, 一上車見到竟然係自動波😱! 頓然晴天霹靂⚡️ 棍波、自動波, 純電動、hybrid、電油、油渣, 全部唔同價錢, 59係指定訂電油棍波車。 租車公司成日會講, 俾你嘅, 會係邊款或同級車型, 所以最後攞到咩車, 始終係一個謎。 而今次咁嚴重貨不對辦, 真係極少有! 頂多都係free upgrade, 但今次係downgrade。  事關第一日行程緊密, 呢筆唔同佢計啦。 因為當日買唔到直飛法蘭克福嘅機票, 由倫敦轉機過去, 已經用多咗幾粒鐘, 攞車後要馬不停蹄, 先至趕得徹天黑前去到Wolfsburg。 SEAT四個字要寫全大階, 因為係個縮寫, 全名係Sociedad Española de Automóviles de Turismo, 意謂「西班牙乘用車公司」。 本身係西班牙品牌, 1986年被于歸福士集團, 因此現時旗下車型, 都同福士家族有莫大關係。至於品牌同型號名稱, 究竟點樣發音呢? 首先, SEAT絕對唔可以當係英文解作「座位」。 依照西班牙文發音, 「E」讀「A」音, 而「A」讀「鴉」音, 所以SEAT讀作「Say壓」。 而Ibiza則讀作「易B花」, 全因14世紀西班牙出咗個「漏風」嘅彼得大帝, 相傳國民為表尊重, 將「C」同「Z」音讀作「TH」, 實行跟佢「全民漏風」! 59最初認識Ibiza呢個名字, 係90年代嘅越野賽事。 當時見到一架車, 外觀有幾分似EF世代嘅本田(Honda) Civic, 就留意起呢個香港冇嘅品牌。 及至WTCC全盛時期, SEAT亦曾經揚威東望洋, 更以油渣引擎大捷! SEAT Ibiza嘅同父異母大家姐 - 福士Polo, 已經告別咗香港市場一段時間, 二手市場上, 街貨量亦唔多, 對香港車迷而言, 話佢比較陌生都唔錯得去邊。當年新車測試, 又唔係由本小編操刀, 連59自己都對佢認識唔深。 2017年推出嘅第五代SEAT Ibiza, 與第六代福士Polo同樣建基於福士集團嘅MQB A0底盤之上, 姊妹型號仲有Audi A1, 同埋喺英國租過嘅Skoda Fabia。 典型B segment佈局, 全長、軸距分別為4, 059mm及2, 564mm, 同Polo完全一樣。 空間運用可算符合當代標準, 後座及行李空間不過不失, 但不必期望太多。呢架Ibiza係FR型號(FR只係trim level, 唔係代表前置後驅😛), 雖然叫做係自動波, 用嘅係七前速DSG波箱, 轉波反應快而爽, 波牙比率設定恰當, 動靜皆宜, 始終引擎低扭較弱, 起步略嫌吃力, 要大腳踩著turbo, 先至進入狀態。 畢竟佢三個汽缸合共只得999cc, 但呢副輸出116匹嘅EA211引擎, 整體表現出色, 耗油量vs.實際力度關係合理。 咁呢架Ibiza有咩投訴? 行得快唔夠定囉! 車架佢夠硬淨, 屬歐洲車應有水準, 彎路操控信心十足, 只係彈弓唔夠硬, 加上懸掛行程略嫌稍長, 行到百三、四就覺得穩定差D。喺德國無限速駕駛, 59都仲係第一次。 交代返背景, 玩車人有派系之分。 59隸屬「劈彎派」, 唔止對直路狂奔興趣不大, 更對巡航速度好有節制, 應快則快。 鬼咩? 行得快嘥油嘛! 錢嚟架🤑 從前喺德國以外嘅歐洲高速公路上, 每當見到掛德國車牌嘅車, 都必定要食佢地塵, 可能佢地慣咗喺祖家係無限速。 話就話無限速, 但不少路段仍有速度限制, 通常130km/h, 但低至80km/h都有。 59唔趕時間, 就唔會無節制地開快車。 但係59明白到一點, 就係同主流速度差距越大, 就會越危險, 因此美國不少高速公路, 會有最低速度限制。 你慢, 人地要左cut右cut避你, 技術低D仲可能唔覺意撞親你, 所以59都係隨波逐流, 揸返快少少咁囉, 百五、六囉, 即係一百英哩左右。 呢架三缸車仔, 只要唔長期大腳催谷, 都唔算大食, 平均油耗約14.9km/L。 但始終頭冚下面有隻蝸牛, 萬惡魔王隨時候命掙扎。去得福士大本營Wolfsburg, 當然要朝一朝聖啦! 睇勻Autostadt展館、廠房導賞團、禾夫斯堡大球場、AutoMuseum Volkswagen等。 原來參觀嘅唔止車迷, 仲有專程嚟睇波嘅⚽️球迷。 經典福士玩家, 認唔認得呢個標誌? 59細個時, 有位親戚有架1968年甲蟲, 記得軚盤中間就見過呢個標誌, 原來佢就係Wolfsburg嘅市徽。相信冇人夠球迷熟悉, Wolfsburg中文譯作禾夫斯堡。 佢市徽上面, 唔止有座古堡 (burg), 仲有隻狼(wolf)企係古堡上面,下面仲有條河。 以上係Autostadt導賞員所講嘅。 唔講唔知, 原來呢條河, 仲係流經Autostadt架!   福士牌香腸, 本來只係造俾員工餐廳食用。 但唔知因為太好食定咩原因, 市場擴展至外銷。 有傳福士造嘅香腸數目仲多過車🤣 真有其事嗎? 有統計指, 2024年, 福士集團全球交車量達900萬輛, 而交腸量則達855萬2千條。 喂... 等等! 點解話福士造香腸多過車, 因為唔計集團中其他品牌, 掛福士Logo出廠嘅車, 只有520萬輛, 真係少過香腸喎! 據聞福士牌香腸在外間有售, 但59喺法蘭克福、柏林、甚至就近禾夫斯堡嘅超級市場都見唔到! 想試食? Autostadt內嘅「轉數錶餐廳」Tachometer隨時恭奉。 連同薯條嘅Currywurst套餐, 盛惠11歐元。 係咪真係咁好食? 59會話, 都係好標準嘅德國香腸咁囉...講起福士牌腸, 1973年推出嘅原裝版本, 係有牛肉成份。 及至90年代瘋牛症風波後, 新配方已停用牛肉。 而Autostadt有售嘅香腸, 有標準版同埋Classic 1973版本, 包裝上冇講得太清楚有冇牛肉成份。 即場食嘅, 亦冇講清楚係邊個版本 (可能只係言語不通)。 59對德國二戰、冷戰歷史好有興趣, 更特別鐘情P08同埋P38兩枝德軍制式手槍。 59 N年前無意中睇到, 冷戰時代嘅西德國民, 同埋盟軍人員, 係點樣由西德邊皮, 穿越東德, 揸車去西柏林, 終於N年後正式成行。史稱Berlin Transit Route嘅唯一路線, 起點由福士大本營所在地 Wolfsburg附近嘅Helmstedt開始, 喺Checkpoint Alpha出境後, 就進入由蘇聯控制嘅東德。 全長165公里嘅東德路段上, 冷戰時期可以停車小休, 但唔可離開呢條指定路線, 直至抵達柏林市郊Potsdam附近嘅Checkpoint Bravo, 就重返西方民主世界, 正式進入西柏林呢個被東德四面包圍嘅孤島。 至於最出名嘅Checkpoint Charlie, 就係由西柏林市區東面, 重返東德嘅關口, 亦係東西德統一後必到嘅旅遊景點之一。 反而Checkpoint Bravo、Checkpoint Alpha, 就只有59之類嘅hardcore, 先會山長水遠去尋幽探秘。 柏林公共交通四通八達, 最可愛係唔搶錢。 如果唔係揸咗車嚟, 59都伶願搭地鐵。 街邊好多時可以免費泊車, 但搵位都唔易。 市內好多街道限速30km/h, 德國人又展示出引其以為榮嘅紀律性, 真你乖乖地行30km/h, 揸車慢過搭地鐵都唔奇! 歷史睇幾日都睇唔完, 講返租車呢筆先。 容許我先跳到大結局, 先講還車。 還車程序非常簡單, 職員只會記錄哩數、油錶, 粗略睇睇車身就走得。 還車後十數分鐘, email收到正式收據, 一睇銀碼就知出咗事! 點解明明我講好入滿油還車, 仲計咗我全缸油價錢嘅？原來攞車時, 個位職員打咗tank purchase落單, 但59講明會入滿油還車, 佢都照打咗, 淨係呢點已經值得被投訴。  入油呢方面要講一講。 租車公司通常有prepaid fuel option, 即係你以比市價平少少嘅價錢, 買咗全缸油。 好處係還車前唔洗搵油站、花時間去入油, 趕早機人仕最方便。 您有本事嘅話, 可以用淨幾滴油還車。 不過唔好算到咁盡, 揸去還車途中冇油就捉蟲啦! 台灣租車又有另一種玩法, 詳情請睇返《租車奇遇記 (1)》。收多咗錢, 當然係對簿公堂啦。 經多次email溝通後, 租車公司仍企硬唔肯將油錢退回, 更莫問俾咗架低一級嘅車我, 完全賴賬! 59無奈要求發咭銀行暫停付款, 但也波拆重重, 銀行左推右推, 唔想做醜人。 件事拖咗個幾月, 終於我係信用咭賬目見到一少筆退款, 咩來頭唔深究啦, 總之未夠收多咗嘅油錢, 59見輸少當贏囉😒 事關銀行幫我跟呢單野個位妹妹仔, 不得不以「冇鬼用」去形容, 口疾疾、唔識野、怕事、唔敢狽飛, 冇一次電話對話唔洗59勞氣鬧鬼佢。 那邊廂, 租車公司見銀行做野, 又send返個email嚟, 叫我補返一個數目。 不過, 油錢、銀行退款、補交金額, 全部都唔match嘅! 仲敢叫59補錢? 啋佢都有味! 立誓以後唔幫襯呢間公司, 點知狹路相逢, 喺《租車奇遇記 (3)》已經再幫襯咁佢。 好彩, 鑊氣冇咁大。 冇order到、或者冇必要嘅野, 一律要決絕地表示唔要, 以免俾人計多咗錢, 除非講明係免費送。  上得山多終遇虎, 越嚟越多租車公司同59有牙齒痕, 長始下去, 第日都唔知租邊間好囉🤪!

今次去到美國, 頭兩日係個空檔, 當然會身痕租車出去遊山玩水啦, 但初到貴境, 最難搞係時差😴, 所以唔confirm成行與否。點知如我所料, 當日半夜兩點瞓醒, 食完早餐覺得精神狀態還可以, 就即刻上網搵車租。 一睇車款覺得唔對路, 點解只有電動車? 今次被安排住係LAX附近嘅機場酒店, 行路去24x7嘅租車中心都係只15分鐘, 咁我就book 7am攞車。不過一睇車款覺得有D唔對路, 點解淨係得返電車? 見價錢唔比遲一日租油車貴好多, 咁電車就電車啦, 當時真係無睇清楚租電車嘅terms, 只係依例睇清楚保險選項。 基本租金、保險 (CDW+SLI)、機場附加費、稅, 暫時總數$133。 咁急上網book車, 要即時俾晒錢都預咗。去攞車時, 再轆多$250按金, 最後過咗5日先收到正式收據 (可能因為隔咗個星期六、日)。 再過多一日, 收到埋「電費單」。 上次喺德國都係租呢間美國公司, 計多咗我錢又唔認脹, 搞到幾L煩😡! 有機會再寫。 極討厭SUV嘅59,  本來都想搵架真.四驅,  因為要去加州內陸沙漠小鎮。結果俾咗架舊款Tesla Model Y我, 不過係舊款Dual Motor, 都叫做係四驅,  啱晒🤩👍! 以美國租車標準嚟講, 呢架車唔止內外污糟, 仲傷痕纍纍🤕, 車身凹咗, 四隻鈴都無忽好肉, 四條胎三個牌子, 新舊不一。 上次喺美國租車都已經係3年前嘅事, 今次攞車流程上有變都唔奇。傳統做法拎住張紙圈低車身嘅損傷, 曾經變為職員拎部iPad同你行一圈, 再變成今次完全自動化, 揸出停車場前有個好似大scanner咁嘅裝置, 自動認出車身有乜損傷喎, 真係先進, 有效節省人手, 美國又多幾個人失業囉🤷‍♂️! 呢款Model Y初到港時, 我係香港代理嘅event淺嚐過。幾年前嘅事, 年中又試咁多車, Model Y係點, 已經冇乜印象🤷‍。一跳上車, 嘗試係個15吋大mon搵我要用嘅功能 - 導航、鏡位、電量, 都算簡而清, 唔洗轉彎抹角, 唯一唔記得點鎖門🤣! 話就話行開會自動鎖, 不過LA治安有幾「好」, 你知我知啦👮! 好彩問AI喚起我當日初試Model 3 Performance嘅回憶, 記得拎住張匙咭係咁捽條B柱🤣, 今次一掂埋去就鎖到🤩👍。 當日只俾咗匙咭我, 租車我又唔會裝app, 我亦唔識setup😛。架車唔知張咭喺車上, 所以一入P波、開過門, 就要再拍咭先郁到車。如果你喺總站等巴士, 可能留意到車長哥哥撻火前, 都要喺八達通機拍職員証, 等如一個簡單嘅login程序, 等公司知道架車邊個揸緊。原來揸Tesla都要好似揸巴士咁, 每次拍咭著車🤣! 當日去到目的地, 我要無數次落車影相, 次次都要係褲袋拎張咭出嚟著車, 好煩! 又唔想擺張咭係車上, 以免錯手開唔到門就大檸樂! 幫我辦手續嘅職員只講過, 還車時要有70%電。開始第一段行程, 要揸接近兩個鐘, 大約100英里。導航一set好, 就幫我計埋去到目的地時剩返幾多電。我唔得閒理呢架Model Y究竟係唔係Long Range啦, 只知道攞車時只有67%電, 去到會得返15%, 估計亦非常準確, 即係即刻要搵地方叉電啦🙄! 到電量咁低時, 一開導航即刻自動彈出叉電站嘅距離、收費、吉位數量。大鄉里出城, 揸開JDM classic, 又冇意圖、冇打算、冇計劃、冇誘因、冇研究過換電車嘅59, 係時候學野啦! 導航帶咗我去一個Tesla嘅Supercharger, 拎起枝野見窿就插啦。一插好, 已經話叉緊囉喎! 點解冇叫我俾錢嘅? 即刻又Google吓, 原來我呢間租車公司, 用Tesla Supercharger係秋後算賬嘅, 另加2.3%附加費。得返十幾%, 要叉到80%走都要成半粒鐘。算, 焗等😒! 入缸油10分鐘都嫌慢啦! 須知電動車越揸得快越食電, 唔同油車高波低轉就又快又慳油。結果前後叉咗3次電,  埋單$58.20, 趕住叉到75%去還車, 然後仆返酒店沖涼、瞓覺🥱。當日油價每加侖$6左右, 算架車唔太食油, 長行高速做到至少30 MPG係公平估計。當日總共行咗280英里左右, 接近5個鐘大部份時間係行75 MPH左右, D電好似搗水咁🤦, 即係叉電只係平過入油少少, 更加絕對行唔晒一缸油。入缸油5分鐘, 叉三次電用咗超過一粒鐘,  咁你就深深體會到, 「一寸光陰一寸金」呢D咁老套嘅道理!喺香港試Model Y個次, 記得個軚扭盡只得每邊一圈。扭盡落車睇睇, 見個轆好似轉得好少。睇返資料, 最小迴旋直徑係12.1米, 同Corolla之類既細車係有明顯分別, 但係美國D路咁闊, 車位又闊, 鈍少少都問題不大, 始終架車唔算太長, 全長4,751mm, wheelbase 2,890mm。轉向比率10.3:1, 個軚勁快, 懸掛同呢四條雞胎又咬得住路面, 係幾好彎, 不過唔係跑車個種感覺, 揸落硬係覺得怪怪地。未試過將架Model Y揸到咁快, 美國上得高速, 65 MPH起跳, 最快有一段行過90, 平均都有75。車速咁快, 好似揸唔到直線咁! (59師兄... 係你手車屎啫!) 個軚真係好敏感!  本來想試吓auto pilot, 最後冇試。美國都係用個26個字母, 不過美式英文無可否認係另一種語文, 無論發音、串字、用詞, 都有別於傳統英式英文。連英國人都未必用得咁盡既英制單位, 美國人仲當係寶。Well... 一個完善既system, 用慣就知點計。美國人都知英制麻鬼煩, 不過計慣計熟就冇問題, 所以工程界仲搞咗D叫「十進英制」嘅野出嚟🤣, 方便計算喎, 「0.1吋」唔係「1分」! 「1分」係1/8吋, 即係0.125吋。59只記得1磅係454克, 因為那些年嘅「big block」V8偈, 排氣量好興用454立方吋, 即係7,440cc, 富豪 (Volvo) B8L副直六turbo都只係大佢少少。 *英/公制換算:1英里 = 1.6公里1美加侖 = 3.785升1英加侖 = 4.546升1 MPG (美加侖) = 0.425 km/L1 MPG (英加侖) = 0.354 km/L1 MPGe = 0.0478 km/kWh

我租車通常唔會揀最平嘅, 通常會揀由尾數起第二、三級個D。 如果係歐洲租, 就更加會make sure唔係自動波。 今次見到Prius都唔係貴Corolla幾多, 咁不如就試吓呢架香港無行貨嘅第五代Prius啦。 我租三日34,188円, total貴過租Yaris一萬円左右。 貴咗喎, 抵唔抵? 請你睇晒呢篇文章。 一款車25年來賣咗五百萬架, 1D都唔簡單! 代號XW60 (ZVW60) 嘅第五代Prius, 保留咗二、三、四代嘅梯形設計, 而車尾稍為以曲線拗平咗少少, 車身亦都長咗, 房車感強咗。 新款成架車大咗一個碼, 全長4,600mm, wheelbase都有2,750mm。 以前一直覺得Prius細過Corolla, 而家反而覺得E210好似縮咗水, XW60變得好明顯大架過E210。 線條靚咗, 貼地得來, 曲線運用上有40系Alphard個種一氣呵成嘅複雜性。 以前Hybrid好似係新世代產物, 好似早幾年D電車咁, 套上個懶係前衛嘅形象可以理解。 今時今日, 連電車都開始要走返貼地路線, 你呢D上一代科技仲邊玩得起前衛呀? 貼地始終都係好事。 前後座空間無投訴, 內櫳設計唔浮誇, 方便實用。 豪華佢玩唔起, 不過好好睇睇就點都做得到。 我最唔滿意係個錶板, 佢用bZ4X同一設計, 即係要係軚頂望埋去, 不過佢軚位比bZ4X好, 唔會過低。 尾箱容量官方數字話就話有410升, 但外形保留第二代Prius沿用至今嘅斜尾設計, 即係往上發展嘅能力嚴重受限, 空間實性唔及得SUV或者MPV咁強, 形狀亦唔及得傳統三廂式房車咁四正實用。 尾箱仲有兩個問題, 唔夠深! 另外, 尾箱頂個塊拉簾, 租車無跟埋, 即係尾箱裝咗乜, 一眼睇到晒。 我個大喼係28吋, 兩個打直放都好fit, 都叫夠做。 有晚去到酒店, 一個日本大叔見我泊個咁窄嘅位用頭入, 感到好驚奇! 佢用有限英文同我吹水, 問我點解唔用尾入, 我一打開尾箱拎喼出嚟, 唔洗捐去後面攞, 佢就明晒。 車廂內噪音, 主要來自胎聲。 行石屎路, 嘈得有D離譜, 不過行鋪得靚嘅泊油路, 又好好多。 風聲唔明顯, 引擎聲同震盪亦隔得唔錯, 雖然未至於唔知引擎行緊定熄咗火。 懸掛係前麥花臣、後雙搖臂結構, 彈弓仍覺稍軟, 吸震筒反應尚算跟得上。 如果入彎、cut線手軚太急, 仲會覺得有少少𠺘, 不過TNGA底盤夠晒硬淨, 加上懸掛行程唔算長, 彎路操控已經相當唔錯。日本本土版本有HEV、PHEV、前驅、E-Four四驅、1.8、2.0等多個配搭。 而今次租呢架係齋版, 195/60R17胎, 鋼鈴膠冚,  車身無任何型號標記, 揭起頭冚睇到引擎係上代嘅2ZR-FXE, 而唔係直噴嘅Dynamic Force引擎。 呢一代轉咗用鋰電池, 儲電量達4.08Ah, 已經比以前大咗好多, 但係高速公路上, 想純粹用電力維持80km/h左右嘅速度, 依然有困難, 否則個EV走行比率就可以更高。呢副只得98匹嘅1.8偈, 加埋輸出95匹嘅1VM摩打都好夠力, 踩落去個力度令我有D唔敢相信佢總輸出只得140匹、142Nm。 呢個e-CVT波箱非常唔錯, 反應相當好。 新一代電摩打明顯地大力咗, 一起步係電摩打做野先, 純正電車嘅即時爆棚扭力, 低速市區慢溜塞車無敵! 入高速公路繼續加速, 引擎介入點再比以前暢順。 離地個D 0-100km/h唔好理, 係山路上斜盡油過車, 都毫無難度, 輕而易舉。 Once again, 呢架只係140匹嘅1.8齋版。 有電車扭力隨傳隨到嘅優點, 尾段又有油車嘅韌力, 只差在Prius唔出棍波, 否則我都要買返架。攞車時顯示, 滿油續航力「只」係八百幾公里, 點知一路揸一路升! 大家唔好唔記得, 我係揸開舊式Turbo車嘅慳油王, 繼續奉行唔無需要就唔踩嘅信念, 希望好似LBX同Jazz HEV個兩次咁, 「out揸」廠方數字, 不過結果失敗告終! 有無搞錯呀? 廠手係咪落斜兼且全程行電架? 最後到還車前入油, 行咗705km, 大約一半高速, 一半山路。 錶板顯示剩餘續航距離仲有307km, 即係全缸油可以行到1012km! 拿.... 唔係淨係日產e-Power先行到過千公里架!32.6km/L耗油量官方數字, 同250cc電單車差唔多, 連我呢個慳油王都做唔到! 友台阿符租個架用2.0偈, 做到24.4km/L。 我租呢架1.8, 廠方數字係慳油過2.0, 我今次做到26.2km/L, EV走行比率更曾經高達90%, 雖然打破唔到廠方數字, 但已經慳油到CLS! 上次試Corolla Cross Hybrid, EV走行比率去到70%已經好impressive啦! Prius係幫Toyota省令招牌嘅代表作, 佢嘅Hybrid技術發揮得好過其他車, 的確不足為奇。 純電續航距離比上代長50%, 實數係幾多就搵唔到資料, 不過返名古屋途中, 有一段長超過十公里嘅塞車慢溜路段, 接近完全行電。 電池行到乘返兩格, 就會著偈叉電。就算Yaris行到12km/L (公平估計啦), 行705km都要59升油, 實際上可能更多。 再者, 就算你好彩, 租到架Yaris係用1.5偈, 加速力夠唔夠呢架1.8 Prius強先? 揸得開心係Priceless架! 今次只係入咗唔夠24升半油, 即係呢一萬円都大概係油錢方面打和咗。 勁呢? 如果做腳車, 仲要揸得多, 真係小數怕長計。 如果揸得少, 好處更加明顯過揸電車。 講耗油量, Prius真係無得輸! 而且, 齋版X日本賣三百萬円有找, 真係好抵揸, 難怪一街都係!還車前入油個陣, 見到隔離揸Note e-Hybrid個一男一女係講國語嘅, 去到還車地點, 又見返呢對陳生陳太, 先知原來揀Prius呢一級Hybrid車, 最後都有機會唔係攞到Prius喎🤣! 今次算好彩囉, 到手嘅真係相中個款車!

今次係高雄租車, 已經係第二次租豐田 (Toyota) Corolla E210「國際版」啦, 所以想重點講呢間租車公司嘅體驗。  今次係第三次係台灣租車, 三次都有唔同做法, 第一次係租車公司職員揸我租個架車嚟機場接我去租車公司搞手續。 第二次最煩! 個間公司無台灣車牌身份證過唔到版, 無外國人專用版面, 搞到要打電話去book! 今次想避免呢個問題, 試吓搵間可以網上完成手續嘅租車公司, 唔止搵到, 過程仲暢順清楚, 只不過要出發前俾晒錢, 另外再轆一萬台幣按金, 網上付款係用，好似旅行社買機票個種介面, 無麻煩野。 Search「台灣租車 香港人」, 出到呢間, 就睇睇咩料。 見佢話有Civic租, 好喎! 今代新Civic (唔係Type-R) 香港無, 未揸過, 就book Civic啦, 1800台幣一日。 點知book完第二日朝早, 就收到佢地whatsapp, 話Civic無晒 (定係根本無?😅 個幾日係街都未見過新Civic!) 佢問我Corolla Altis o唔ok? 價錢一樣, 我話好啦。 雖然台版Yaris同Vios都係用千五偈, 不過台版Corolla Altis用千八偈, 夠力D好, 貴Vios/Yaris 300蚊一日。 到攞車前一日, 公司通知我book個location係無人服務😅 吓? 第一次租車咁神秘🤣 我book朝早十點攞車, 佢就前一晚八點半已經由Whatsapp通知咗架車嘅「藏身地點」俾我, 係好清楚講明乜街幾號, 有google map location嘅link, 影埋相見到附近係咩舖頭, 當然睇到車牌, 仲話我聽條匙擺咗係車入面邊道。 咁... 我即刻問佢, 架車係咪無鎖門? 佢話係!😰 無錯, 係呀! 泊咗係街無鎖門呀! 唔知高雄治安好得咁緊要, 定係當地人對一架咁嘅車無興趣, 加上租車公司已經買重保險? 本來想出去攞走條匙、鎖好道門, 不過沖咗涼唔想落街。 佢地決定得咁做, 即係ok啦。 牙齒當金洗, 講好十點攞車, 我真係過咗十點先去, 去到架車仲係道, 無俾人偷到😝。  還車一樣係咁神秘, 一樣咁高度信任。 叫我影前後左右四個正面, 影低泊車地點, 影埋錶板睇到油錶, 仲有叫我最緊要唔好鎖門🤣 十足的士半夜收工咁😝 鎖咗會加收開鎖費2000蚊台幣! 我話明佢聽, 只鎖剩一道門, 當然唔係司機位啦。攞車上路第一段, 大部份係高速公路巡航, 第一次入油時錶板顯示5.8L/100km (17.2km/L), 我又一次揸贏 (15.7km/L) 廠方公佈數字啦😇! 最後返到高雄還車時, 錶板顯示升到7.0L/100km (14.3km/L), 呢個數字都合理。  呢間租車公司, 入油又係玩「我俾幾多你, 你俾返幾多我」, 唔係慣例「full to full」, 其實呢個玩法仲奸過「tank purchase」😤 入油枝油針郁得好慢, 即係搏你入多咗益佢😒 我唔係精打細算, 不過我多年來對耗油量有嘅深入研究。 我最後一次入油, 計好晒要行幾遠路, 再基於錶板顯示耗油量, 只係預鬆咗少少。 到還車時, 估計只係蝕咗唔夠兩升俾佢。 好彩台灣當時只係台幣廿九幾蚊一升, 唔入肉。 我同Corolla有一種奇妙嘅緣份,  我不陋都唔係Corolla四門三廂嘅粉絲, 縱使經我手擁有過、打理過嘅Corolla房車至少有4架, 由92至110不等, 加埋租車合共有十二、三架, 撞都撞過兩架😝 Corolla無野好得過係可靠僸用、少野壞, 悶蛋先係致命傷! 尤其是四門房車系列。 轎跑系列樣靚身材正, 性能更可以同宿敵Civic爭一日長短。 每一代Corolla跑車都例必被低估、被同期其他車種蓋過, 包括當代嘅GR Corolla。 識欣賞4A-GE個種遂少嚟、嚟極都仲嚟緊嘅性格, 情操比其他杯麵式、薯片式「即食」性能高得多。 Camry、Rav4、Yaris、Prius、Sienta都揸過, 都感受到TNGA底盤硬淨咗嘅感覺, 但係用GA-C底盤嘅E210, 偏偏感覺就無乜大進步, 可能舒適向嘅懸掛唔硬, 加上行程仲係偏長, 令到body roll依然明顯。 去到墾丁至台東呢一段路, 又上落山又彎又斜, 真正考驗到呢架ZRE211嘅操控。 揸山路, 唔要求快, 係要你轉就轉, 要你停就停, 要你有力就要即刻有力。 咁ZRE211係呢方面攞幾多分呢? 分我唔識俾啦, 我頂多會俾僅僅合格囉。 未至於會推頭推到入唔到彎, 但如果遁跡性再好少少, 操控會加返好多分。 幾次落斜入彎, 推頭過咗隔離線少少, 但係如果我狠心D, 扭多D軚, 我覺得係會入到, 唔洗出界, 不過車上有客, 廢事大顯身手嚇親人啦😝! 幾年前轉用TNGA新底盤嘅XV70 Camry啱啱出個時, 都期望佢揸落會唔會做到接近歐洲車個種硬朗、爽快, 雖然比起舊款Camry已有明顯進步, 但的確同5系、A5、E-Class、Giulia仲有好一段距離。 E210 Corolla同Golf、2系、A3、A-Class/CLA嘅差距就更大。呢架2025年ZRE211嘅TSS仲係2.0版本, 不過佢個LKA同追撞警告好似特別敏感, 唔知係咪加咗台灣限定嘅「三寶偵測」功能, 覺得佢敏感過香港試個架Camry XV70。 都唔知實在轆到路面條線未, 已經必一聲響警報, 同埋即刻主動幫你扭軚, 所以台9線入隧道之前個段又彎又斜又窄嘅山路, 響到未停過。 今次呢架, 同上次美國租個架, 都係用無膠頂蓋嘅2ZR-FE偈, 出140ps、17.5kgm算中規中矩, 「正常」駕駛情況下無投訴, 呃到吓人添! 波箱係Aisin K120 「Direct Shift 」CVT, 台灣代理叫甚麼甚麼Super CVT-i無段變速系統附7速手自排功能 G AI-Shift Control G值感應換檔邏輯bra👓bra👓bra..... 唉! 是L但啦! 講咁L多咪都係自動波😒 市區慢行同高速公路巡航反應都唔錯, 唔會拖泥帶水, 但係想急速起步反而有D「立」, 點踩佢都係要諗一諗先肯郁, 就算開咗Sport mode都分別不大。 嘗試放肆地踩呢個電子油門, 大油起步, 第一個反應係轉數唔肯上, 似係電腦唔肯俾油, 跟住係短暫嘅有聲無畫, 轉數肯上, 可以飆上到四、五千轉, 但感覺唔到有明顯嘅加速力。 架車新到得二千幾km, 應該都run in好啦, 感覺似係跣緊極力子, 究竟發生緊咩事? 咁...  咁嘅起步表現, 要Direct Shift嚟靶鬼咩? 本來係為咗低速、低轉爽D, 實際上連第一啖力都出唔到, 🤣🤦輸晒!今次發覺Direct Shift呢個「一波」仲有一個問題, 燈位未停定晒要俾油走, 或者塞車慢流, 次次都要由CVT同一波之間轉上轉落, 轉落一波仲要挫一挫, 好煩! 總結Aisin呢個K120 Direct Shift波箱嘅表現, 「入好」一波、極力子嚙合後, 加速反應良好, 市區慢行、公路巡航時CVT反應積極, 扣返起步反應同極端環境下嘅分數, 仍算合格。 無錯! 搞咗咁多野, 都只係合格, 好有原地踏步嘅感覺。租用呢架車嘅40小時間, 做咗一件幾癲嘅事, 就係係多良揸咗佢上山, 去睇廢教堂 (上多良長老教會遺址), 但去到見到貨不對辦, 懷疑去錯地方。 定係近年打風+地震, 搞到連門口個十字架都甩埋😢? 冒住掉唔到頭嘅險上山, 見唔到佢蘆山真面目有D可惜, 他朝有機會揸電單車環島, 一定要再去過, 兩個轆上去易過四個轆好多, 條路勁窄。全長4,630mm全長、2,700mm wheelbase, 同Prius XW60差唔多, 話細唔細, 前後座空間充足, 用嚟做的士都好fit👍, 難怪曼谷一街都係各年代嘅Corolla的士。 最小迴旋半徑5.2米, 對於呢個size嘅車而言, 算唔差。 上山呢段路, 有好多個髮夾彎, 當中上坡段只有兩個要三手軚先入到, 而其中一個只要偷夠位就唔洗褪後, 所以落山就只有一個彎要褪後, 上山個陣亦有D驚掉唔到頭要褪後返落嚟就大檸樂! 好彩到教堂遺址前最後一個彎, 有個位唔止掉到頭, 仲可以泊一陣, 唔阻路。 呢個時候發現一個問題, 就係呢個波箱配合電子油門, 衍生雙重問題! 係極斜路段, 油門要踩到好低, 電腦先識俾油。 而且, 明明有轉數, 架車都唔行! 呢架仲有手拉式機械手制都幫唔用手, 我慣常地用左腳踩Brake, 都驚驚佢溜後! 上次上武嶺個架日產Tiida都有類似問題, 係上斜慢急彎, 踩穿地板都起唔返, 爭在轉數未跌到落idle溜後, 咁嘅反應真係幾無奈! 傳統自動波唔會有呢種反應。總結呢架第12代國際版Corolla ZRE211嘅評價係點呢? 咪合格囉🤣 Toyota為開飯而造嘅車, 性能方面特登唔俾夠你, 如果你覺得揸得開心、坐得舒服, 已經賺晒。 Corolla房車, 揸落代代都悶到嘔茄, 慳油又唔係佢最慳, 連二手價都唔及得某些同級對手, 唯僸挨取勝👍。 揸唔爛、少野壞呢D形容詞, 相信依然可以套用到呢一代Corolla。 後記: 未擁有過任何一款Corolla轎跑, 依然係我玩車生涯中嘅一個遺憾🥲 

第二度舉辦的「清水灣鄉村俱樂部老爺車展 Cars For Good 2025」，由清水灣高爾夫鄉村俱樂部主辦，於2025年12月7日（星期日）上午10時至下午4時，在香港清水灣高爾夫鄉村俱樂部舉行。 今年大約有一百七十部經典車參加，在海天相連海邊的高爾夫場上展示，經典名車同藍天碧海互相輝映，影相打卡一流，不少車主一家大小、或三五知己在草地上聊天，十分寫意，成為車迷最佳郊遊睇靚車活動。全港唯一海景球道車展 值得一讚係今年有十多個車會參展，所以焦點車款勁多，步入球場最搶眼係四架麥拿倫超級跑車，其中一架仲係McLaren 765LT賽道限量版。香港老爺車會就有六十架車參展，陣容鼎盛；加上又係日本漫畫《頭文字D》30週年紀念，香港頭文字D車主會在現場亦展示多款在漫畫、動漫及電影的經典車款，當中兩部車身由藝術家手繪，裡裡外外都非常吸睛。喜歡JDM的車迷，一定大飽眼福。參展車的安排主要以車會分區展出 由於場地廣闊，小組式的編排，更方便觀眾近距離欣賞。據知今年網上報名非常踴躍，大會安排的免費穿梭巴士在星期六中午後就已滿額，可見香港愛車之人甚多。香港老爺車會在當日亦有進行Concours d'Elegance，簡單講即係老爺車選美，得獎老爺車如下： Best Saloon：1996 Toyota Crown JZS151Best Convertible：2000 BMW E46 M3Best Coupe：1976 Mazda RX-3Best 4 X 4：1981 Toyota Land Cruser FJ45Best 1950s：1959 Austin Healey SpriteBest 1960s：1968 Toyota CoronaBest 1970s：1972 Volkswagen T2Best 1980s：1984 Lotus Esprit TurboBest 1990s：1992 Suzuki CappuccinoBest 2000s：2008 Merceded-Benz SL63 AMG (R230)Best Post-2010：Aston Martin V8 Vantage 007 EditionBest Presented：1964 Citroen Ami 6後記：睇靚車之餘，又可做善事 我們訪問了清水灣鄉村俱樂部主席黃偉光醫生 (Dr. Jack Wong)，他表示有去年Cars For Good的經驗，今年準備更充足，參展經典車亦大增至170架，大會亦安排公眾可免費入場參觀，乘搭穿梭巴士來往將軍澳站則要預早網上預約，否則也可自行安排前往。在現場又安排了小孩電動車及彈跳城堡，場內設有餐車提供多款餐飲，而且接受八達通及信用卡付款，方便大家享用美食，讓大小來賓在音樂陪伴下輕鬆的氣氛中度過一個悠閒下午。現場亦設有本地慈善組織MORE GOOD 及清水灣鄉村俱樂部慈善基金義賣攤位，睇靚車之餘，又可做善事。 展望未來，Dr. Jack Wong表示只要觀眾及參展車主喜歡，就會繼續每年都舉辦「清水灣鄉村俱樂部老爺車展 Cars For Good」,同時亦繼續注入慈善原素；其中一個方式可以係收入場費作為慈善捐款，令整個活動更有意義。  

浙江國際賽車場的AMG體驗中心，係全球首個AMG體驗中心，位於中國紹興，2020年8月21日開幕，旁邊就係浙江國際賽車場全長3.2公里嘅FIA二級賽道，提供專門為賽道而設嘅體驗。專為車迷而設的體驗中心AMG體驗中心設施，包括透過VR裝置，配合四軸動態賽車模擬器，體驗賽道飛馳；又可以選擇試聽多款AMG車型嘅引擎聲浪，中心又設有Café 63咖啡店及AMG配件專門店，滿足車迷消費欲望。不過重點當然係可以體驗不同嘅AMG車型，而且可以在AMG駕駛學院車手指導下，試駕最新AMG車型，體驗賽道駕駛樂趣，而且仲有專屬賽道日供車迷參與。亞洲首個G-Class體驗中心 至於緊貼AMG體驗中心而建嘅G-Class體驗中心，係亞洲首個G-Class體驗中心，2023年4月開幕。中心入口展示一輛停泊在傾斜45度牆上嘅G-Class，顯示其45度爬坡能力及強勁越野性能。場內設有專業越野試駕場地，模擬不同嘅陡坡、側傾斜坡、碎石路及大石坑等極端地形，在專業教練指導下試駕G-Class車型，感受其在賽道與越野場地的性能讓訪客體驗G-Class的越野能力。揸G 63鬥直路加速 進入賽車場第一項體驗係揸G 63鬥直路加速，呢個雖然只係簡約版G 63 Drag Racing，不過平時好難有機會用到硬派越野車玩直路加速鬥快，同時亦可以體驗一下G 63嘅AMG 4.0 公升 V8 雙渦輪增壓引擎加速威力。講到加速，G 63嘅0-100km/h加速只係4.3秒，加埋V8引擎咆哮聲浪，係幾過癮的。AMG Experience 首先試駕嘅AMG Experience環節，就係駕駛AMG CLA 45 S 4MATIC玩slalom (繞椿)，要用最短時間完成繞椿，並且整架車完全停在藍白色方陣之內。一起步就係一連串S彎，然後向左J-turn，需要準確地控制着油門，以最高速度出彎，接着又係連續幾個左和右彎，最後一小段直路加速，然後急煞車進入藍白色方陣之內。 這個環節其實也是玩操控體驗，如何在高速繞椿時不會錯了線道而損失速度及時間，要訣是入彎時已要望向下一個繞椿，還有油門嘅控制，最後要掌握Late Braking力度及煞車點，才能準確停在藍白色方陣之內。賽道激試AMG跑車 我哋試咗五款嘅AMG跑車，包括性能最勁，最大馬力816hp，0-100km/h只需2.8秒嘅AMG GT 63 S E Performance；然後係最大馬力585hp，0-100km/h加速3.6秒，外形好靚嘅開篷跑車AMG SL 63 4Matic+；仲有最大馬力449hp，0-100km/h加速4.2秒嘅AMG CLE 53 4Matic+  Coupe；最大馬力367hp，0-100km/h加速5秒嘅AMG GT 50 (中國版)；同埋最大馬力421hp，0-100km/h加速3.9秒嘅AMG A 45 S 4 Matic+。最鍾意其中兩架 激劈完幾款AMG跑車，我最鍾意其中兩架，第一架就係AMG GT 63 S，點解鍾意GT 63呢？佢係一架大馬力跑車，車身相當大，但係前後車重平衡做得好好，因為將電池放在車尾，令到重腳煞車時，車頭唔會過度前俯，所以推頭情況大幅減少了，入彎就會更精準。在賽道嘅彎路上，發覺可以好激烈咁在賽道上駕駛，GT 63 S依然好穩定；至於AMG SL 63始終係一架開篷跑車，車架係會冇咁剛硬，你會感覺到架車在彎路上，扭曲程度會比GT 63明顯，所以冇咁好彎。 另外一架我鍾意嘅就係A 45 S，在賽道上表現好劈得，操控反應係介乎前驅同後驅之間，雖然整體上都係前驅感覺多些，但係又因為咁而比較易操控 ，你轉彎太急太快，它有機會推頭，但由於車身小巧靈活，就算有少少推頭，都好易補救，所以A 45 S同GT 63 S係今次AMG賽道經驗中，我最鍾意呢两款。G-Trail專門越野挑戰項目 下午係分別以汽油版G 500及電動版G 580 with EQ Technology，挑戰G-Trail，即係G-Class專屬叢林越野體驗基地，總長度雖然只係2.2公里，不過已合共有8個不同難度嘅越野項目，包括涉水、以交叉軸蠕行方式駛過極端起伏坑坡、駛上傾斜32度土坡、碎石路、顛簸起伏路況、爬上極斜坡、顛簸竹林泥石路，最後係電G專場嘅G-Turn。難度最高兩個項目 越野挑戰項目難度最高，係交叉軸，呢個時候就係前、中、後三個差速鎖發揮嘅時間，因為要蠕行駛過極端起伏坑坡，四個車輪都唔可以空轉，先可以在個別車輪凌空時，仲可以維持操控。 另一個對普通車係高難度項目，就係駛上超過45度嘅斜坡，分別係混凝土鋪裝嘅65度斜坡，同埋50度泥石土坡。不過以純電動G 580上斜坡完全係輕鬆容易，只要用咗Low Range駕駛模式，就好似用全自動傻瓜機影相，一切都自動化，無需踩油門，已可以自動慢駛爬上斜坡。  電動G 580做G-Turn無難度 進行G-Turn前，需要選用Low Range及Rock模式，按下G-Turn按鈕，螢幕上會出現確認提示，確認後踩住制動踏板，必須hold實軚盤不能扭軚，想向左轉的話，拉動軚盤上嘅左撥片就會轉左，向右就拉右撥片轉右，同時踩油門到底，就會開始自轉，鬆開油門就會停止。 G-Turn運作原理係透過四個摩打獨立控制每個車輪，使左右車輪能夠以相反的方向旋轉，利用反向旋轉產生軸心自轉效應，令G-Class能夠在其軸距範圍內轉圈。花絮篇 是次活動，仲有一位由廠方邀請嘅嘉賓Tyson Yoshi參與，仲在G-Turn環節率先試做G-Turn。Tyson本身都鍾意車，試完車會唔會上癮買番架G 580 with EQ Technology呢。  鍾意油G定電G？ 試完越野及G-Turn，我都係鍾意汽油版，因為駕駛時那種頓挫感，你會覺得整架車係浪漫一點；至於電G，駕乘係比較舒適，加上電子系統又很厲害，基本上去到一些很高難度45度以上斜坡，你只要按了Low Range模式，鬆開油門，就會自動走上斜坡，我會稱這個為傻瓜機模式，你都不需要識越野，總之有教練或者給你一句指示，，它就自動用一個很緩慢安全爬行的模式，很安全地上斜坡。 駕駛汽油版G-Class，你的右腳要控制得油門及制動好好，尤其係起伏好大嘅泥石路，只要大力一點油門都會挫一挫；衝一衝，所以控制上你需要多些技術， 我哋呢啲自認有少少技術嘅，梗係鍾意汽油G，但係對普通用家來講，電G就可以好輕鬆易控，最重要係唔需要花錢入油。值得車友參加的駕駛體驗活動 今次嘅試車，我個人覺得好值得有興趣知多些、學多些駕駛技巧嘅車友報名參加，在賽道及越野場地都有專業教練，教大家如何開得順啲， 開得好玩啲。 AMG在內地開了這兩個中心，交通相當方便。將來我想很多車主，或者廠方會搞一些活動，大家都可以來這裏玩玩。如果大家對AMG及G-Class活動有興趣，可以透過以下電郵：mbhk_marketing@mercedes-benz.com 索取資料。

香港人擁有車叫養車，因為車在香港是奢侈品，仲有係車位都非常昂貴，所以叫做「養」車；至於玩車，就更加可稱之為：最毒的「敗家」玩車文化了。Photo by：Playful相信最毒的玩車文化，應該係 Island Vintage Bus 的車迷，因為保育一架古董巴士，等於養老，而且古董巴士不像限量跑車及JDM，不會升值，仲要年年保養，除咗付出心機時間，仲要付出金錢。今年Island Vintage Bus 揸fit人表示，搞保育古董巴士咁辛苦，無非想傳承下去，希望可以吸引年輕車迷一起擔擔抬抬沉重的巴士零件，學吓保育古董巴士。今年IVB仲多咗架古董人力車，原來係汽車修理同業商會的朋友（潘成就先生）的藏品。IVB表示：以民間力量，將已絕跡於港島的中華巴士重現大家眼前，更透過匯聚中巴前員工，以徵集更多關於這家百年老號的故事、保留及承傳大家的集體回憶，係 IVB 一眾成員一直以來的願景。「蟲在香港」，係玩VW Beetle甲蟲。又玩又整車，完全投入。今年仲佈置成新春氣氛，預先帶來農曆新年的歡樂！至於呢班玩日本Suzuki四驅越野車的車迷，除咗玩得開心，仲整埋打卡相框，唔講以為係汽車代理商搞宣傳，原來係中咗毒的車迷。呢幾位車迷朋友中的係Crown毒，個會叫Crown Crew，主力玩大皇冠，當中仲有架係第二代豐田Century，擺到明係懷舊朋友，其中一位仲專登出埋珍藏的大哥大手提電話，服未！至於呢兩位gentleman，一位玩classic Beetle，一位其實鍾意玩電單車。右邊那位更為自己架classic Beetle設計及製作冷氣系統，我以為佢係工程師，原來佢係graphic designer，為了愛車，可以去到幾盡？玩到變成生意，叫Monoduo Custom，總之就犀利啦！眼利的車迷，見到相片一定會大叫：雙To！而圖中右二負責Car in Life的朋友，又係玩經典老爺車中毒，一於自已搵零件玩復修，玩到做埋專門的生意。至於另外圖中的Morgan係近年車廠的傑作，可惜左軚車在香港未能出牌行車，但唔知點解，大陸的左軚車就可以出FU及FV字頭車牌在香港行車。香港人對classic Mini的情意結也非常深遠，中毒的人未必很多，但已足以影響幾代香港人。因為外形復古中帶點潮流味而令人中毒的bB，亦成為車迷熱愛的一款當代經典pick-up。電單車及綿羊，同樣會令人中毒，不過只要開心，再毒又如何！一樣會玩過天荒地老。玩車會中毒的其中一個原因，可能係好喜歡car camping。玩越野車中毒之後，好自然會想揸越野車周圍去。不過凡事有例行，近年有些車，例如JDM，不但被譽為contemporary classics，仲越來越升值，玩幾年再放售，隨時賺錢。唔信？睇完今年各個車會的展車，可能你都會中毒，玩埋一份！

在香港有一群熱愛經典老爺車的車迷，為愛車投入大量心血及時間，為的就是要欣賞及分享汽車帶來的樂趣。 Photo by：Playful老實講，保養及維修一架老爺車的金錢及時間代價，隨時昂貴過買一架新車，不過從他們的眼神流露的滿足感，只要愛車狀態一流，就知道一切對他們都是值得的。今年的「香港老爺車會周年午餐」依然在上水雙魚河馬會的大草地上泊滿了「不同國籍」的老爺車，不過大草地也像現時的新車，已經過facelift，原本的車路經過整修，加入了小孩單車徑的功能，各幅草地的邊陲，也種了小植物，儼然就是小朋友的單車樂園，不過就因為多了小植物，而且不能隨意破壞，增添了要駕車駛入及駛出草地的難度。儘管多了限制，老爺車會的工作人員，依然熟練地指揮各車主泊好車輛，也不斷提示現場的車主，要禮讓駕着單車的小朋友。至於周年午餐及主禮台的地點，也從大草地轉移至另外位置，好處是空間寬敞些，缺點是不能一面午餐，一面又可看到老爺車。周年午餐在下午三點結束，各車主按照指示慢慢的駕車打道回府。小插曲是其中一塊草地的出口位比較窄，為免傷及小植物，要勞動四五位老爺車會工作人員，化身360度的人肉泊車鏡頭，指引車主車前倒後多次，才能不損植物而駛離草地。小插曲看似麻煩，但這群熱愛經典老爺車的車迷，卻出奇地樂在其中。我忽然想起有不少女性表示：都唔知點解，一對住車，不分年齡國籍，男人都會變成kidult！

今年的展會規模為歷屆之最，合共四個展館，設有七個主題區域，總面積21,000平方米，共有100多家展商，展出不同品牌、不同產地、不同時期的乘用車、商用車、摩托車等共約200輛。 Photo by：Playful今屆香港國際汽車博覽終於有比較搶眼的焦點，因為有不少首次在香港首次公開亮相的新車，包MG開篷跑車Cyberster、比亞迪旗下的豪華MPV品牌Denza D9；另外更有首次來港的汽車品牌，包括以製造電視螢幕起家的創維，也推出旗下的創維汽車，展出已經量產的 Skyworth-K 中型電動SUV，及展示未來科技的 Skyhome 概念車。展會分為七個主題展區，包括車迷最熱捧的超級跑車專區；日系改裝車和汽車維修博物館作重點介紹的「香港汽車文化節」，其中一大亮點是老爺車迷絕對不能錯過，有20架狀態如新車的經典MiniShow，同時更有Best of the Show評選，從中選出兩架成為「展覽最佳Mini」。除此之外，仲有零件、配件和服務大街的展覽，展示香港汽車維修業的歷史；至於IMX親子嘉年華則包括：模型車館、國際電子競技賽、遙控車大賽，還有三輛來自越南的手工木制超級跑車；中國內地電動車館，也是今屆重點之一，展示不同的電動車及技術的最新發展；還有展出不同國家新車的國際展廳，而兩個轆車迷就一定不能錯過電單車館。2023香港國際汽車博覽詳情日期：2023年12月14-17日（星期四至日）時間：11:00 - 20:00 （星期日閉館時間19:00）地址：亞洲國際博覽館